En la djuderiya paso los dias de mi manseves,
Syento alegriya kuando me akodro kada ves,
Una vida kalma i syempre yena de semplesidad,
Eramos orozos se remarkava en kada edad.
*
Todos de vida muy modesta,no mostravan rikezas,
No se viya enemistades,kuvdisyos o grandezas.
Ijos,ijas,elmueras biviyan kon padres i madres,
Todos los vizinos eramos yenos de amistades.
*
Respekto i alegriyas reynava en las famiyas,
Sin aver los luksos i las rikezas de estos dias,
No aviya la ambisyon de oy,eramos humanos,
En los Shabades,en las fyestas todos komo ermanos.
*
Si d'alguna ansya era atakado un vizino,
O no puediya alevantarse por ser hazino,
Era kudyado por todos,le davamos una mano,
En amostrandole las amistades de un ermano.
*
Enrikisidos de buenos sentimyentos i amor,
Biviyamos una vida diferente de este dor.
Agora kuando meldo kada dia las nuvelas,
I vyendo todas las desgrasyas de la vida te yelas,
Rovos ,matansinas las gerras i las salvajerias,
Te aleshan de tu bivyenta i de tus alegrias...
Kero bivir komo antes sin saver nada de esto
O en borracho inchir mis dias,o irme mas presto.
Haim Vitali Sadacca
Montreal
Aún no hay Comentarios/Trackbacks para este post...